ინვესტიციები რეგიონში

  აჭარის რეგიონში ინვესტიციების ზრდა აიხსნება ქვეყანაში მიმდინარე პოლიტიკურ-ეკონომიკური და ლიბერალური რეფორმებით. ამასთან აჭარის რეგიონი საქართველოს სხვა რეგიონებთან შედარებით გამოირჩევა გეოეკონომიკური მდებარეობით, განვითარებული ინფრასტრუქტურით, ძლიერი საფინანსო სისტემით, საერთაშორისო იმიჯის ზრდით.
   2008 წელს ჩვენს რეგიონში განხორციელებულმა ინვესტიციების საერთო მოცულობამ 130 მლნ. აშშ დოლარი შეადგინა. აქედან 95 მლნ. აშშ დოლარი წარმოადგენდა უცხოურ ინვესტიციებს, 35 მლნ. აშშ დოლარი - ადგილობრივ ინვესტიციებს. 2007 წელთან შედარებით ინვესტიციების 35%-იანი კლება, მნიშვნელოვან წილად განპირობებული იყო 2008 წლის აგვისტოში განვითარებული მოვლენებით, რამაც მნიშვნელოვნად შეუშალა ხელი რიგი მსხვილი ინვესტიციების განხორციელებას. თუმცა როგორც საპროგნოზო მონაცემებიდან ჩანს 2009 წელს კვლავ მოსალოდნელია საინვესტიციო აქტივობის ზრდა.
   2005-2008 წლებში მნიშვნელოვანი ინვესტიციები განხორციელდა რეგიონის ეკონომიკის სხვადასხვა სექტორში: ტურიზმში, მშენებლობაში, მრეწველობაში, ინფრასტრუქტურასა და მომსახურების სხვადასხვა სფერში.
დარგებს შორის მოზიდულ ინვესტიციათა რაოდენობის მიხედვით პირველ ადგილზეა ტურიზმის სექტორი. რაც ძირითადად განპირობებულია ჩვენი რეგიონის ტურისტული პოტენციალით, ბოლო წლებში განხორციელებული წარმატებული საპრივატიზაციო პროცესით და უცხოელი ინვესტორების დაინტერესებით მაქსიმალურად გააუმჯობესონ და გამოიყენონ აჭარის ტურისტული პოტენციალი.
   ინვესტიციების მსხვილ მასშტაბებზე მეტყველებს თანამედროვე სასტუმრო კომპლექსებისა და გასართობი ინფრასტრუქტურის ინტენსიური მშენებლობები მთელი რეგიონის ფარგლებში.
   2008 წელს ექსპლუატაციაში შევიდნენ ისე მაღალი დონის სასტუმრო-კომპლექსები, როგორებიცაა - ჯორჯიან პალას ჰოტელი, ბაკური-ჯი, ელეგანტი, ისტამბული და სხვები.
   მიმდინარეობს მაღალი კლასის სასტუმროების მშენებლობა და რეგიონის სასტუმრო ბიზნესში შემოდიან ისეთი ცნობილი ბრენდები, როგორიცაა Radisson, Sheraton Palace, Hilton, Hyatt, Hotel Belle Vue, Sea Shore Hotel და სხვები.
   აგრეთვე აღნიშვნის ღირსია მსხვილმასშტაბიანი ინვესტიციები მშენებლობის სექტორში. დღეს აჭარაში ნამდვილი სამშენებლო ბუმია, ერთდროულად შენდება რამოდენიმე მსხვილი მრავალსართულიანი საცხოვრებელი კომპლექსი.
მრეწველობის დარგში, 2005-2008 წლებში აჭარაში გაიხსნა რამოდენიმე მსხვილი კვების გადამამუშავებელი საწარმო, საფეიქრო საწარმოები, სამრეწველო და სავაჭრო დანიშნულების საწარმოები, ამოქმედდა ქიმიურ-ფარმაცევტული ქარხანა, გაიხსნა რამოდენიმე ახალი წიქვილკომბინატი.

ინვესტიციები აჭარაში 2004-2008 წლებში
(მლნ. აშშ. დოლარი)

	2004	2005	2006	2007	2008	2009 (პროგ)
სულ ინვესტიციები	50	100	140	200	130	235
ადგილობრივი ინვესტიციები	28,5	53,6	59,8	67,6	35	71
უცხოური ინვესტიციები	21,5	46,4	46,4	80,2	132,4	165

 

 

 

 ინვესტიციები პრივატიზებულ ობიექტებში

   ბოლო წლებში განხორციელებული წარმატებული საპრივატიზაციო პროცესი, გახდა ერთ-ერთი იმ წინაპირობათაგანი, რომლებმაც ხელი შეუწყვეს ინვესტიციათა ნაკადის ზრდას რეგიონში.

 ინვესტიციები პრივატიზებულ ობიექტებში 2004-2008 წლებში
(მლნ. აშშ დოლარი)

	2004	2005	2006	2007	2008	2009 (პროგ)
სულ ინვესტიციები	50	100	140	200	130	235
ტურიზმი	13,6	34,2	55,8	78,6	51,1	91,7
ტრანსპორტი და კავშირგაბმულობა	18,0	30,0	40,0	55,0	35,8	63,5
მშენებლობა	12,2	25,2	28,5	39,0	25,4	47,0
მრეწველობა	3,5	7,2	11,9	23,9	15,5	28,2
სხვა დარგები	2,8	3,5	3,8	3,5	2,3	4,7